பங்குச்சந்தை - இலாபம்/நஷ்டம் எவ்வளவு? - II

முதல் பகுதி

அதாவது பங்குச்சந்தை 4.14 மடங்கு வளர்ச்சியில், நண்பரின் முதலீட்டின் வளர்ச்சியோ 0.5 மடங்கு. அவருடைய மதிப்பீட்டின்படி நல்ல வளர்ச்சி(!?). ஆனால் அவருடைய முதலீட்டை பங்குச்சந்தையின் வளர்ச்சியுடன் ஒப்பிடும்பொழுது குறைவு. பங்குச்சந்தையின் போக்கை பொருத்து தன்னுடைய 'portfolio' வை அவர் மாற்றிருக்க வேண்டும்.

ஃபாண்டுகளில் கிடைக்கின்ற தொகையுடன் ஒப்பிடும்பொழுது பெரிய வித்தியாசம் இல்லை. இதற்கு ரிஸ்க் உள்ள பங்குச்சந்தையில் முதலீடு செய்ய வேண்டிய அவசியமில்லை. பதிலாக ஃபாண்டுகளிலேயே முதலீடு செய்திருக்கலாம்.

மேலும் அவர் வருடத்திற்கு செலுத்திய டிமேட் (Demat) fee மற்றும் பங்குகளை வாங்கி,விற்பதற்கு கொடுக்கும் brokerage fee ம் கணக்கில் எடுத்துக் கொள்ளவேண்டும்.

நண்பருடைய முதலீடு 100 சதவீதம் வளர்ச்சி அடைந்திருந்தாலும், பங்குச்சந்தையின் வளர்ச்சியான 414 சதவீதத்தைவிட குறைவுதான்.

நம்முடைய முதலீடும் (கிட்டத்தட்ட) பங்குச்சந்தையின் வளர்ச்சிக்கு நிகராக மாறவேண்டும். கிடைக்கின்ற இலாபத்தை வைத்தாவது இந்த சோதனை முயற்சியில் இறங்கலாம்.

பங்குச்சந்தையில் ஒரு வீழ்ச்சி ஏற்படும்பொழுது எப்படி நம்முடைய முதலீட்டுக்கும் வீழ்ச்சி ஏற்படுகிறதோ அதேபோல பங்குச்சந்தையில் ஒரு ஏற்றம் இருக்கும்பொழுது அது நம்முடைய முதலீட்டிலும் இருக்க வேண்டும் அல்லவா?.

எனக்கு தெரிந்தவரை ....ஆன் - லைன் வர்த்தகத்தில் "Portfolio Tracker" என்ற வசதியில்லை. இருந்திருந்தால் நம்முடைய பங்குகளின் இலாபம், நஷ்டங்களைப் பற்றி நமக்கு ஒரு தெளிவும், புரிதலும் கிடைத்திருக்கும்.

அ) நாம் வாங்கிய பொழுது பங்கின் விலை/தேதி
ஆ) விற்கும் பொழுது அதன் விலை/தேதி
இ) Brokerage மற்றும் Demat fee
ஈ) நிகர இலாபம்/நஷ்டம்

இந்த விவரங்கள் இருந்திருந்தால் நாம் வாங்கி, விற்கும் பொழுது நம்முடைய பங்கு எவ்வாறு செயல்பட்டது/செயல்படுகிறது [இலாபம் - நஷ்டம்] என்ற விவரங்கள் தெரியவரும்.

பங்கின் பெயர்
வாங்கிய தேதி
வாங்கிய விலை
விற்ற விலை
விற்ற தேதி
Brokerage/Demat fee.

மேலே குறிப்பிட்ட தகவல்களின் அடிப்படையில் Excelல் பதிவு செய்தல் நலம்.

பங்குச்சந்தை - இலாபம்/நஷ்டம் எவ்வளவு? - I

நண்பர் ஒருவர்... எனக்கு பங்குச்சந்தை என்றால் என்னனு தெரிவதற்கு முன்னாலே பங்குச்சந்தையிலே முதலீடு செய்தவர். வருடம் 2002. அப்பொழுது பங்குச்சந்தை 3200 - 3500 புள்ளிகள் இருந்திருக்கும். "அதிகமா ஆசைபடாமல்", 50 சதவீதம் இலாபம் போதும் என்ற நோக்கில் ஒரு இலட்சம் ரூபாய் முதலீடு செய்தார். வங்கி/தபால்துறை சேமிப்பை விட நல்ல இலாபம் என்பது அவருடைய கணக்கு. இப்பொழுது (5 வருடத்திற்கு பிறகு) ஒன்றரை இலட்சம் அவருடைய கணக்கில் இருக்கிறது. இப்படி நம்மில் பலபேருடைய மனநிலை...

ஆனால் இப்பொழுது பங்குச்சந்தையோ 18,000 புள்ளிகளை தாண்டிவிட்டது.

பங்குச்சந்தையின் வளர்ச்சியோ....

உயர்வு (அ) இலாபம் = (18000 - 3500 ) / 3500 = 4.14 அதாவது... 414 %

இந்த 5 வருடத்தில் பங்குச்சந்தை 414 சதவீதம் வளர்ச்சி அடைந்துள்ளது.

இதே அளவில் இவருடைய முதலீட்டின் வளர்ச்சி இருந்திருந்தால்

இலாபம் = (414 - 50) / 50 = 7.28 அதாவது 728%

அதாவது ஒரு இலட்சம் ரூபாய் 728 % சதவீதம் வளர்ச்சி அடைந்திருக்க வேண்டும். கிட்டதட்ட ஏழு இலட்ச ரூபாய் அவரிடம் இருந்திருக்க வேண்டும். ஆனால் அவருடைய கணக்கின்படி அப்படி இல்லையே? ஏன்?

இப்பொழுது இன்னொரு கணக்கு....

அந்த ஒரு இலட்சத்தை நண்பர் வரி-விலக்கு பாண்டுகளில் முதலீடு செய்வதாக வைத்துக்கொள்வோம். மூன்று வருடம் பணத்தை எடுத்திருக்க முடியாது. அதிகபட்சம் 6 % வட்டி கிடைத்திருக்கும். மூன்று வருடத்தில் 18 %. வரி (30%) கட்டதேவையில்லை . அதனால், சேமிப்பு = 30 + 18 = 48%.

அதாவது மூன்று வருடத்தில் 48%. வருடத்திற்கு 16% (48/3) இலாபம்.

ஆனால் பங்குச்சந்தையில் 5 வருடத்தில் அவருக்கு கிடைத்ததோ 50% . வருடத்திற்கு 10% (50/5) தான்.

நாம் முதலீடு செய்த பணம் நமக்கு வரும் என்று உத்திரவாதமில்லாத பங்குச்சந்தையைவிட எந்த ரிஸ்க்கும் இல்லாத பாண்டுகளில் அதே அளவு இலாபம் கிடைக்கிறது. எப்படி?

எங்கேயோ தப்பு இருக்கிறதா? பங்குச்சந்தையை பற்றி நமது புரிதலிலா அல்லது அதன் மதிப்பீட்டிலா?

(இன்னும் பேசலாம்)