ஐ போன் (I Phone)

ஐ-பாட் (I Pod) க்கு அப்புறம், ஆப்பிள் நிறுவனத்தின் அடுத்த அதிரடி, ஐ போன் (I Phone) . நாம் சிவாஜிக்கும், தசரவாதாரத்திற்கும் விடிய விடிய வரிசையில் நிற்பதைப்போல, ஏகப்பட்ட எதிர்பார்ப்புடன் அமெரிக்கர்கள் இந்த ஐ-போன் வாங்குவதற்கு வரிசையில் நிற்பதை செய்திகளிலும்/நேரிலும் பார்த்து இருக்கலாம்.

இந்த வருட ஆஸ்கார் நிகழ்ச்சியின்போதுகூட 'ஹலோ (Hello)' என்ற வித்தியாசமான விளம்பரத்தின் மூலம் எல்லோரையும் 'அட' என்று ஆச்சியப்படுத்தியவர்கள்.

அப்படி என்னதான் இதில விசேசம்...?

விசைப்பலகை (Key board) கிடையாது. எல்லாமே டச் ஸ்கிரீன்தான்!! 2 மெகா பிக்சல் கேமிரா, ஒளி/ஒலி, Bluetooth னு ஏகப்பட்ட சாமாச்சாரங்கள் இருக்கு. இதன் அளவு 3.5 இஞ்ச் (8.9 செ.மீ), எடை 135 கிராம் (4.8 oz) தான். இணையதளம்/வலைப்பூ எல்லாம் 'மேயலாம்'.

'அட 3.5 இஞ்ச் தான.. இதில எந்தளவுக்கு பார்க்கமுடியும் நினைச்சிங்கனா... நீங்க கண்டிப்பா 'Demo' பாருங்க..

தற்சமயம் இரண்டு விதமான (4 GB & 8 GB) மெமரி சிப்பில் மட்டுமே வெளிவந்துள்ளது (ஐ-பாட்ல 30GB, 60GBக்கு இருக்கிறப்ப இதில அதிகமே 8GBதான்). 4 GBன் விலை $499 & 8 GBன் விலை $599 மட்டுமே! ஐ-டியூன் (I-Tunes) மூலமாகத்தான் இதை activate பண்ண முடியும்.

வெளிவந்த இரண்டே நாட்களில் 500,000 (அதாவது 160 மில்லியன் டாலர்) ஐ போன்கள் விற்று சாதனை படைத்துள்ளது. இதில் 8GB உள்ள ஐ-போன் வாங்கியவர்கள்தான் அதிகமாம். இன்றைய தேதிக்கு 200,000 விற்றிடுக்கும் என்று நம்பலாம்.

ஒரு 8GB ஐ-போன் விற்றால், ஆப்பிள் நிறுவனத்திற்கு 333 டாலர் கிடைக்குமாம்.

கை தொலைபேசி (Mobile Phone) சந்தையில் ஒரு சதவீதத்தை 'கைப்பற்றுவது'தான் அவர்களின் குறிக்கோளாம். அதாவது ஒரு வருடத்தில் 10 மில்லியன் ஐ-போன்கள் விற்க வேண்டும். அமெரிக்க சந்தையில், MP3 பிளேயர்களில் 63% பேர் ஐ-பாட் பயன்படுத்துகின்றனர் என்பது கூடுதல் தகவல்.

இப்போதைக்கு ஏடி&டி (AT&T ) நிறுவனத்துடன் மட்டும் ஒப்பந்தம் செய்துள்ளார்கள். இதனால் AT&T க்கு வருடத்திற்கு 2-3 பில்லியன் டாலர்கள் வருவாய் கிடைக்கும். இந்த வருட(2007) இறுதியில் கனடா மற்றும் Vodafone மூலமாக ஐரோப்பாவிலும் அடுத்த வருடம் மெக்சிகோ, ஆஸ்திரேலியா மற்றும் Airtel மூலமாக இந்தியாவிற்கும் வர இருக்கிறதாம். (நம்ம ஊருல விலை என்னவாம் இருக்கும்....?!)

10-12 வருடங்களுக்கு முன்னால் மைக்கேல் கோவச் (Michael Kovatch) என்பவர் தன் சொந்த தேவைக்கு iphone.com என்ற இணையதளத்தை பதிவுசெய்ய, அவரிடம் இருந்து, ஆப்பிள் நிறுவனம் 1 மில்லியன் அமெரிக்க டாலர் கொடுத்து வாங்கியுள்ளார்கள்.